“Tiavo
Andriamanitrao mihoatra noho ny zavatra rehetra, ary tiavo ny namanao tahaka ny
tenanao”. Io no tena anton’ny fampisehoana goavana nokarakarain’ny fiangonana
FVKFM, izay nampatsiahivin’i Eveka Antonio Lobato, tompon’ andraikitra amin’ny
asa fitoriana eto Madagasikara, teo am-panombohana ny fampisehoana ny Sabotsy
faha-31 Martsa 2012 lasa teo, tao amin’ny Kianja mitafon’i Mahamasina.
Misahiran-tsaina
hatrany amin’ny fanampiana ireo izay mijaly ny FVKFM, ka nikarakara ity fampisehoana
ity, izay efa fanindroany izao, tamin’ny alalan’ny vondron’ny ‘Nouvelle Génération’,
ary tafiditra ao anatin’ireo Asa Sosialy tanterahiny. Tamin’ity taona ity, ary
noho ny fiaraha-miasa tamin’ny Kaominin’Antananarivo Renivohitra, dia nifidy fikambanana
Zoki-olona roa ny fiangonana (FIZOMIA sy AZOI izay fikambanana miahy ny zoki-olona),
izay nahazahoana taratasim-bola mitentina 16 850 000,00 Ariary, izay
fitambaran’ny vola azo rehetra tamin’ity fampisehoana goavana ity. Faly tokoa ny
solontenan’ireo fikambanana ka nisaotra ny fiangonana noho ny nifidianany ireo
fikambanana ireo tao anatin’ny fikambanana maro.
Nanome
voninahitra ity lanonana ity ny solontenan’ny Filohan’ny Délégation Spéciale Antananarivo
sy ny Ministeran’ny Mponina sy ny raharaha sosialy.
Ny
Antoko Mpihiran’ny FVKFM, ny vondron’ny ‘Nouvelle Génération’ ny tarika ‘Les
Adelines’, ‘Asaph’ dia nanome ny tsara indrindra tamin’ity tolakandrom-piderana
ity, manoloana ny mpijery mihoatra ny efatra arivo, izay tsy nanana faniriana
ny ho lasa ny fotoana, satria tena manina an’ireo hiran’ireo tarika rehetra
ireo.
Andriamatoa
Rakotomavo Jacky kosa, izay filoha lefitry ny FVKFM, dia nisaotra ny tsirairay
tamin’ny fiaraha-miombona tamin’izao asa sosialy izao, ary nanararaotra ny
fotoana izy nanazava tamin’ny mpijery ny anjara asa sy andraikitry ny FVKFM.
Miara-miombona
hanampy ireo izay mijaly, nanao tolakandrom-piderana ho an’Andriamanitra,
niaraka tamin’ny tarika tiany, am-pifaliana sy miaraka amin’ny fianakaviana …
faly sy ravo ny rehetra. Amin’ny herintaona indray ny fotoana manaraka, any
amin’ny ‘Palais des Sports’, araka ny fanamby napetraka sy nataon’ny Filoha
lefitry ny FVKFM.
